第13回  公仔麵（二）
由德寶出品、潘源良執導嘅電影《戀愛季節》，就好似一齣加長版嘅MV，有好多歌舞同夾band嘅場面，一開頭就聽到家駒唱「哦～喔～嗷」，如果你係佢歌迷，一定識接住落去唱「永遠等待、永遠嘅等待」。
除咗有真的Beyond現身，戲中仲有隊假band，叫做Voices，鼓手係初現大銀幕嘅林保怡、鍵琴陳少琪、主音李麗珍（方心美代唱），結他就係阿正同我。
呢隊Voices，表演咗《我是能源》呢首歌，我做嘅其他插曲有《迷戀》、《夢竟成真》。
而《繼續追尋》前奏短暫出現在一場Disco戲中，勉強算埋插曲。
最後一幕出現嘅《Kiss Me Goodbye》，係達明一派唯一一首改編歌，呢首歌嘅原作版權由寶麗金擁有，所以攞嚟改編比較方便。
仲有個驚喜係阿Lam都唱咗段《阿Lam日記》，佢係德寶嘅人，客串又係方便。
《戀愛季節》嘅劇本，原先陳冠中已經寫好，後來因為俞琤屬意明仔做主角，潘源良同明仔相識好耐，實在太熟，於是就番明仔性格，修改咗劇本。
我除咗負責插曲，亦要做幾隻新歌放入即將出版嘅大碟，明仔忙完拍戲，會趕嚟同陳少琪度下新歌嘅歌詞，有日喺茶餐廳搵明仔，幾乎認唔出，原來佢剪咗頭髮！
「嘩！剪短咗！幾時拍完呀？」
明仔就沒好氣咁講：「唉！本來拍完，公司話要補番場ending，要拍多一日。」
原來潘源良嘅午夜場導演版，係無最尾幾分鐘嘅ending。呢個ending，並唔係佢想要嘅。
既然明仔剪短髮，咁我以為自己可以留番長，點知張叔平話，唔得，阿達繼續去跑馬地大光明剷青！
P.S.： 有人話煮公仔麵嘅時間，就好似愛情來臨一樣，要剛剛好，唔可以太早，亦唔可以太遲。方丈希望等待中的你或妳，都捕捉到呢一刻「剛剛好」！
圖：Beyond在《戀愛季節》中表演《永遠等待》，方丈睇番都好滾動。唔知家駒在天堂的生日派對，有無食公仔麵？圖文Ⓒ劉以達 提防假冒、藍剔為記！

https://www.facebook.com/photo?fbid=661266295819586&set=a.159353442677543